Hauptseite

DVD actualisada sa basa sin software libra

Wikimedia CH lantscha en collavuraziun cun il project openZIM al di da Linux (LinuxTag 2009) dals 24 fin ils 27 da zercladur a Berlin ina nova ediziun da la DVD da Vichipedia. Sin la DVD sa chattan passa 900’000 artitgels da la Vichipedia tudestga inclusiv ina tschertga. Il project openZIM sviluppescha in format cun il num "ZIM". Quai format pussibilitescha d’arcunar effizient ipertexts sco Vichipedia u autras paginas d’internet inclusiv ina tschertga e maletgs. Latiers vegnan las datas cumprimidas fitg ferm. Cunquai han ils artitgels da Vichipedia occupà mo 1,4 GB sin il disc.

Cun la software libra che sa chatta medemamain sin la DVD èsi pussaivel da guardar e crear datotecas da ZIM. Ina biblioteca cun tut las funcziuns necessarias simplifitgescha als sviluppaders sco era als editurs da trair a niz il format ZIM per agens products. Damai che la software sa chatta anc en ina fasa da test ha l’uniun Wikimedia CH laschà producir 500 DVD per reparter gratuitamain al di da Linux. Manuel Schneider, il meander dal project openZIM e commember da la suprastanza da Wikimedia CH declera: “Era sche nus sa chattain en la fasa da test, è la publicaziun fitg impurtanta per nus. Nus essan leds da mintga agid che nus survegnin tar la cuntinuaziun dal svilup. Latiers tutga era l’annunzia d’errurs e problems cun la software.”

Dapi l’avrigl 2009 datti ina collavuraziun tranter la Wikimedia Foundation, la gestiunaria da Vichipedia cun sedia a San Francisco en ils Stadis Unids. Ils sviluppaders da la Wikimedia Foundation lavuran londervi d’integrar il format ZIM en ils process d’exports regulars, uschia ch’i dat en il futur datotecas da ZIM da tut ils projects da Wikimedia ed en tut las linguas. Ultra da quai duai quai vegnir implementà ina funcziun correspundenta en il MediaWiki, la software davos Vichipedia e numerus auters Wikis. Ina nova versiun da la DVD da Vichipedia en lingua spagnola è planisada per la conferenza da Wikimania dals 26 enfin ils 28 d’avust a Buenos Aires.

Ulteriuras infurmaziuns davart il project openZIM

Il project openZim exista dapi il favrer 2009. Il project precedent sa numnava TntReader. Quel è naschì suenter che la chasa editur Directmedia aveva proponi da sviluppar ina software libra per il format da datoteca Zeno. Directmedia aveva definì quest format per publitgar ina DVD cun artitgels da Vichipedia. L’ultima DVD ha Directmedia publitgà 2007/2008. Quella cuntegneva sper il reader proprietar per Windows per l’emprima giada era il TntReader sco open source che funcziunava sin Linux e Mac OS X. Il project openZIM ha sviluppà enavant il format da datoteca ZIM (Zeno IMproved) e publitgà quel. La nova software sco era la documentaziun vegn publitgada sut la licenza GPL.

Il project openZIM è da chattar dals 24 enfin ils 27 da zercladur al di da Linux a Berlin en la halla 7.2a, al stan 113a. Dapli infurmaziuns datti sut: http://openzim.org/ u http://www.linuxtag.de/.

Wikimedia CH s’engascha tar il svilup dad in format da standard per cuntegns da Vichipedia che n’èn betg online, sco era da metter a disposiziun ils utensils necessaris per pudair producir e leger quai format.

Il format da datas liber ZIM sa basa sin datotecas da Zeno, ch’èn vegnidas sviluppadas da la chasa editura Directmedia. Quellas datotecas vegnan duvradas per pudair duvrar bibliotecas sco Vichipedia senza internet. L’ediziun da la DVD da Vichipedia 2006/2007 dovra per l’emprima giada quest format e furnescha er gist il ZenoReader – che mussa ils artitgels en il browser. Tommi Mäkitalo dal project Tntnet ha sviluppà l’emprim remplazzament per il ZenoReader. Il Tntrader funcziuna sin tut ils sistems operativs ch’èn cumpatibels cun POSIX. En cooperaziun cun Directmedia è il format da datas ed il reader vegnì sviluppads enavant. Il resultat è da vesair sin la DVD da Vichipedia 2007/2008 ensemen cun la software libra da Mäkitalo.

La disponibilitad da software libra e d’in format da datas effizient ha dentant era sveglià il giavisch da pudair producir sez datotecas da Zeno ed uschia metter a disposiziun offline ulteriuras bibliotecas. Wikimedia CH sustegn quest idea cun metter a disposiziun a Tommi Mäkitalo e ses team in server ed in budget per inscunters da sviluppaders. L’emprim inscunter ha gì lieu la fin d’emna dals 21 fa favrer 2009. Il team da project ha emprendì d’enconuscher in l’auter persunalmain, ha mess ensemen in plan da termins, discutà la concepziun tecnica ed intginas meglieraziuns dal format. Il project è vegnì numnà enturn en openZIM, quai ord dal motiv ch’i sa tracta d’in project da la communitad da open source: l’implementaziun averta da la meglieraziun dal format Zeno (Zeno Improved ZIM).

Planisà èsi da procurar ch’ins po duvrar ils utensils fin il di da Linux 2009 uschia ch’ins po preschentar la Vichipedia tudestga sco datoteca da ZIM.

Pagina d’internet: http://openzim.org

Wikimedia CH ha dà a la Wikimedia Foundation 35’000 francs. Ils daners vegnan duvrads per il manaschi dals servers da statistica. Enfin ussa èn las statisticas davart ils projects da la Wikimedia Foundation, tranter auter era da la Vichipedia, vegnidas actualisadas mo sporadicamain. Las statisticas èn cuntanschiblas via la pagina dad internet http://stats.wikimedia.org. Planisadas èn ulteriuras statisticas sco per exempel davart las versiuns controlladas (http://de.wikipedia.org/wiki/Hilfe:Gesichtete_und_geprüfte_Versionen). Wikimedia CH vul promover cun ils daners statisticas pli actualas. Las statisticas duain gidar, da vesair trends ad uras, promover transparenza e da resguardar basegns dals auturs. Vinavant èn las statisticas da grond interess scientific. Ils projects da la Wikimedia Foundation vegnan finanziads entras donaziuns. Principalmain vegn fatg in appel da donaziuns davent dal november enfin mez schaner sin las paginas da Vichipedia sco era dad auters projects da la Wikimedia Foundation. Finamira da l’appel 2008/09 è stà 6 milliuns dollars. Quella finamira han ins surpassà. Durant quai temp hai tar Wikimedia CH donaziuns en l’autezza da passa 38’000 francs. Durant l’entir onn 2008 ha Wikimedia CH survegnì stgars 62’000 francs donaziuns, quai ch’è prest il dubel da 2007.